"Mohabbat Ka Suhana Safar" (The Conclusion)

"Mohabbat...Mohabbat.... Mohabbat
Uff.. Ye aashiqana Mohabbat
Sarthak or Nikhil k darmiyan
Mohabbat... Mohabbat...bas ye Mohabbat"
Mai hoon sabka dost 'Nits'...jo karne aaya hoon do premiyo ki adhoori prem kahani puri... Kahani Sarthak or Nikhil ki...
Nikhil Sarthak ko mann me basaye wapas Lucknow apne aalishaan ghar aa gaya tha isi ummeed me k ek din uska call aayega lekin aaj 5 din ho gaye uske call ka koi naamo nishaan na tha. Wo roj apne phone ko taktaki baandhe uske call ka intezaar kiya karta tha. Uski bechaini ka aalam Nupur ko bhi chubhne laga tha shayad isliye usne Nikhil se puch hi liya...
"Kya baat hai Nikhil... Jab se hum Shimla trip se wapas aaye hai tum kuch badle badle se lag rahe ho ? ", Nupur ne uske room me aate hi poocha.
"Nahi kuch bhi nahi",usne bahana banaya.
"Waise tum yaha kaise?", Nikhil ne hi cross question kiya.
"Haan.. Wo papa ne tumhe bulaya hai", Nupur k itna kehne par wo ek dum se utha or chal diya.
Nikhil k Pita yani Madhav Singh... Shehar k janemaane raees or social worker.. Jinke rutbe k charche Shehar se lekar unke gaav tak faile huye the. Ghar me unke ishare k bina patta tak nahi hilta tha. Unke isi darr se Nikhil bhi kabhi khul kar saamne nahi aa paya or aaj bhi wo unki ek awaaj par unke room me dauda chala gaya.
"Aapne bulaya papa", Nikhil ne bade adab se kaha
"Hmmm... Andar aa jaao", unhone bhaari awaaj me kaha.
Madhav ji kehna shuru karte hai.
"Jab se tum sab bacche Shimla se aaye ho humne apne lakht-e-jigar se acche se baat hi nahi ki", Madhav ji ne bade pyaar se kaha jispar Nikhil halka sa muskura diya. Lekin Shimla ka naam sunte hi uski najaro me Sarthak fir se sama gaya.
"Kya hua, kaha kho gaye? ", Madhav ji ne uska dhyaan toda.
"Nahi papa, kuch nahi", usne baatein chhupayi lekin Madhav ji ki paarkhi najaro ne uski bechaini ko bhaanp liya tha.
Next Day...
"Maa, tai ji dekho kon aaya hai", Adhiraj kisi ladki k saath ghar k andar aaya.
"Arre Saloni..kitne dino baad", Nupur, Suhani k saath saath Nikhil ki maa Vasundhara or uski Chachi Shalini k chehro par bhi khushi ki tarang aa jaati hai lekin Nikhil ka chehra to maano utar chuka tha.
Saloni Adhiraj ki dost or ghar me sabki ladli thi. Jo humesha se hi Nikhil k aas paas rehne ka bahana dhunda karti ti thi or ye baat Nikhil ko bilkul pasand nahi thi. Isliye usse bachne k liye wo apne room me bhaag aaya tabhi uske phone ki ring baji.
"Hello..",Samne se koi awaj nahi aayi
"Hello kon bol raha hai", Nikhil ne dubara kaha
Saamne se bas ek awaaj aayi..
Dil sambhal ja zara
Phir mohabbat karne chala hai tu
Dil yahin ruk ja zara
Phir mohabbat karne chala hai tu"
Ye line sunkar Nikhil k dhadkate dil se bas ek hi awaaj nikali, "Sarthak"
"Haan.. Mai Sarthak bol raha hoon, tumhara Sarthak", itne dino k jatan k baad aaj Sarthak ka phone finally aa gaya tha.
"Tum kaha the itne din?, mai kab se wait kar raha hoon tumhare call ka?", Nikhil ne gusse me sawalo ki jhadi laga di thi.
"Ruko... Ruko saans to le lo, tumne to apne dil ki baat rumal k sahare keh di lekin mujhe tumse mil kar apne dil ki baat kehni thi, isliye kal mai Shiv Mandir me tumhara wait karunga", usne uski bechaini kam karni chahi
"Kya... Tum yahi ho? ", lekin uski bechaini aur badh gayi thi.
"Haan..Mai tumhare liye yaha aaya hoon or Kal tumhara wait karunga or akele aana, apne bhai behen k bina", Sarthak ne call cut kar diya. Idhar Nikhil ka dil khushi se Raajdhani train jitna tezz dhadak raha tha. Jis Sehjade k call ka wo itne din se besabari se intezaar kar raha tha wo to khud prakat ho gaya tha. Aaj Nikhil k dil ki dua Shiv ji ne sun li thi.
Next Day...
Nikhil kayi dino baad Sarthak se milne k liye utaavla tha. Isliye wo saj dhaj k ghar se nikal raha tha tabhi gate par Saloni se takra gaya.
"Waah...! kaha chali sawari aaj", Saloni uske look par lattu ho gayi thi.
"Mai kahi bhi jaau tumse matlab, jab dekho yaha chali aati ho...huuh", Nikhil akada
"Haye, kya ada hai. Janab ki", Saloni dhire dhire uske kareeb aa rahi thi jo use accha nahi lag raha tha tabhi wo use dhakka dete huye bahar nikal gaya.
"Ek din maine tumhe apna diwana na bana diya to mera naam Saloni nahi", usne itraate huye khud se kaha.
In Shiv Mandir...
Nikhil ka mood Saloni ne already kharab kar diya tha us par abhi tak use Sarthak k bhi darshan nahi huye the. Wo uska intezaar kar raha tha or Shiv ji se dua kar raha tha jis disha me usne aaj apna pehla kadam uthaya hai wo safal ho. Uski aankhein band thi lekin jab aankhen kholta hai to Shiv ji ki murti k saamne Sarthak ko paata hai. Aaj kayi dino baad usne use dekha tha. Kayi dino baad dono ki najare ek baar fir se mili thi. Wo uski taraf khushi se bhaga lekin agale hi pal ruk gaya.
"Kya hua?", Sarthak baahein failaye uska intezaar kar raha tha.
"Nahi Sarthak ye mujhe sahi nahi lag raha hai", Nikhil ne najare ferte huye kaha.
"Kyu tumhe mujhpe bharosa nahi raha?", Sarthak ne bebasi se pucha.
"Aisi baat nahi hai lekin.. Lekin..Lekin mai tumhe bilkul nahi jaanta", Nikhil ne rukte rukte hi sahi par apni baat puri ki.
"To Ab jaan lo, or mai tumhare liye hi yaha aaya hoon, tumhare us paigaam k sahare or yakeen maano maine dhoka dene k liye itna lamba Mohabbat Ka Safar tay nahi kiya hai", Sarthak ne apne haathon se uske chehre ko upar karte huye kaha.
Ispar Nikhil aankho me aansu bharte huye Sarthak ki baahon me simat gaya. Mohabbat k suhane safar ko manjil milti dikh rahi thi. Dono k muh se bas ek lafz nikal rahe the "I Love You"
Hawao ne Mandir k ghante baja diye the maano Shiv ji ne bhi unke rishte ko anumati de di ho.
"Meelon ka jaise tha faasla,
Sadiyon ka jaise tha raasta,
Anjaan tha dil ke hona hai kya,
Fir bhi hume, lagta hai yeh,
Humko to milna hi tha"
Pyaar k aalam me aise hi samay gujarta gaya. Nikhil aksar hi ghar me bahana bana k Sarthak se milne aane laga. Nikhil apne parivaar, Pita ki pratistha, or Samaj ko bhool hi gaya tha. Un dono ki duniya haseen ho chali thi.
Kuch din baad...
Sarthak or Nikhil Park me apne pyaar bhare pal ka bharpoor maja le rahe the.
"Waise Dear... Itne din ho gaye hume milte huye, tumhe nahi lagta hume kuch karna chahiye", Sarthak thoda naughty hua .
"Kya karna chahiye", Nikhil ne sab jaante huye bhi baatein ghumayi.
"Wahi jo log aksar pyaar me karte hai", Sarthak uske kareeb aane laga.
"Lagta hai tumhe kuch chahiye waise thappad kaisa rahega", Nikhil ne majakiya andaz me kaha.
"Nahi nahi... Wo mai Shimla me kha chuka hoon is baar kuch or", Sarthak bhi maanne wala nahi tha.
Is baat par dono khilkhila kar hus diye. Tabhi Sarthak ne apna mood change kiya or Nikhil k kareeb aane laga Nikhil ne bhi aankhein band kar li... Nikhil apne honth aage karne laga lekin Sarthak ne uske mathe par kiss kiya.
"abhi Mujhe sirf tumhara pyaar or vishvas chahiye", Sarthak ne emotional hote huye kaha.
Is par dono ek doosre ko gale laga liya.
"Jo tum dekho to dil pighle,
Jo dil pighle nazrein jhuke,
Jhuki nazrein to tan machle,
Jo tan machle saasein ruke,
Pura deewana main ho gaya hu,
Paaya tumhe to main kho gaya hu"
In Nikhil's Home...
Jab Nikhil ghar aaya to ghar ka mahaul badla badla sa tha. Sab khush the jaise koi jashan ho.
Use kuch samajh nahi aa raha tha.
"Nikhil aaj mai bahut khush hoon", Nupur bhaagte huye aayi or uske gale lag gayi.
Saloni bhi use dekh sarma k andar bhaag gayi.
"Mere bete ko kisi ki najar na lage", Vasundhara ji use Kajal ka tika lagate huye boli.
"Maine Saloni k mata Pita ko phone kar diya hai wo jald pahuch rahe hai yaha shagun le kar", Shalini Vasundhara ji se kehti hai.
"Ye sab kya ho raha hai maa?", Nikhil ko abhi bhi kuch samajh nahi aa raha tha.
"Arre tere Papa ne Saloni k saath tera rishta tay kar diya hai", Vasundhara ji ne apne bete ko gale lagate huye kaha.
"Kya", ye sunkar uske pairo tale zameen na rahi.
"Achanak, mujhse bina puche?", uski najaro me kayi unsuljhe sawal the.
"Saloni to hum sabko pehle se pasand thi, bas tumhare haan ki der thi jo tumne aaj taau ji se keh di", Suhani k itna kehte hi wo bina samay gavaye Madhav ji k paas gaya.
"Papa aap ne mujhse bina pooche mera rishta Saloni k saath tay kar diya?", aaj pehli baar usne badle tevar me apne Pita se sawal kiya tha.
"To Kya Tumhe kisi ladke k saath ranglaliya manane doon", Madhav ji bhi sher ki tarha dahadte huye bole.
Ye sun Nikhil ki aankho k saamne andhera chhane laga, wo chakkara gaya... use samjhte der na lagi k use or Sarthak ko park me dekh liya gaya hai.
"Haan mai apne baccho ki ek ek harkat par najar rakhta hoon or maine tumhe chhoot di hai iska matlab ye nahi k tum uska galat fayeda uthao", wo gusse me the.
"Lekin mai Sarthak se bahut pyaar karta hoon or wo ek accha ladka hai", apne pyaar k liye wo atal tha.
Is par Madhav ji ne use ek jor se thappad rassed diya,"Namakool kaisi aulaad hai tu, Ek ladke k saath..chiii, khud ka nahi lekin is parivaar ki ijjat or samaj ka to socha hota. Upar se besharami ki had paar kar raha hai.
"Kis dogle samaj ki duhai de rahe hai aap papa", aaj Nikhil bhi piche hatne wala nahi tha.
"Mai kuch nahi sunna chahta kal teri sagai hai or kuch din baad shaadi or is sach ko koi badal nahi sakta tu bhi nahi. Mai mere purvajo ki ijjat mitti me milne nahi doonga.
Mohabbat k suhane Safar me rukavate paida ho gayi thi. Ye tufan do premiyo ki zindagi tabha karne wala tha..
Nikhil apne room me apni barbaad hoti zindagi par aansu baha raha tha udhar Saloni k saare sapne sach ho gaye the jo usne humesha se dekhe the is parivaar ki bahu banne k. Lekin Sarthak in sab se anjaan tha.
Next day...
Sarthak Nikhil ko baar baar call laga raha tha lekin wo uska saamna karne ki halat me bilkul na tha. Use kuch ajeeb laga. Isliye usne usse milne ki tarkeeb sochi.
Idhar bemann se or parivaar ke dabaab me Nikhil ne Saloni se sagai kar li .
"Tum dono ki jodi sada sada k liye bani rahe", Madhav ji khushi se dono ko ashirwaad de rahe the. Aaj unhe apne bete par garv ho raha tha. Or
Nikhil ka dil pal pal ye soch kar kat raha tha k wo Sarthak k saath kitna bada dhokha kar raha hai. jo insaan uske bharose yaha aaya tha uska hi trust chakana choor kar raha hai. Lekin wo karta bhi to kya kyuki wo apne Pita se bhi utna hi pyaar karta tha. Jitna Sarthak se.
In Night
Nikhil ko badi mushkil se neend aayi thi. Tabhi achanak uske room ki balcony me kisi ki aahat huyi.
"Sarthak tum yaha", wo chonka.
"Tum to mujhe bhool gaye socha mai hi tumse milne aa jaau", Sarthak ne befikri se kaha.
"Meri shaadi hone wali hai", Nikhil ne fikarmandi se kahta hua usse lipat gaya.
"Mai jaanta hoon Nupur ne mujhe sab bata diya hai, isliye mai tumhe lene aaya hoon, ye pehle hi bata deta lekin tumne phone hi nahi receive kiya".,Sarthak uske sir par haath pherte huye khe raha tha
"Kya Nupur ne?", Nikhil fir chonka
"Haan, maine us din tumhari or papa ki baat sun li thi isliye maine Sarthak ko kaha tumhe yaha se bhaga le jaane ke liye", Nupur ne bhi room me aate huye kaha.
"Nahi... Jo tum dono chahte ho wo nahi ho sakta mai apne papa ki ijjat pe daag nahi laga sakta agar maine aisa kiya to wo marr jayenge", Nikhil ne sankoch se kaha.
"Lekin is pyaar ko yaha koi nahi samjhega", Sarthak or Nupur dono ne use samjhaya.
"Samjhna hoga unhe... Mai samjhaunga", Nikhil ne lambi saans lete huye kaha.
"Lekin kaise? ", dono k hi najaro me ye sawal mandra raha tha.
Next Day....
Idhar shaadi ki taiyari joro shoro par thi. Mehmaano ka aana bhi shuru ho gaya tha... Lekin Nikhil isi uljhan me tha k ye shaadi kaise roke... Achanak use Saloni ka khayaal aaya.
"Mujhe tumse kuch kehna hai", usne Saloni ko chupke se store room me le jaa kar kaha.
"Haye.... Tumhari baatein to mai kaan band kar bhi sun sakti hu", Saloni ne situation ka advantage lene ki koshish ki.
"Ye majak ka waqt nahi hai, do zindagi ka sawal hai, Plz tum is shaadi se, mana kar do", Nikhil ne uske saamne haath jode.
"Kya, Lekin kyu? .... Kuch din me humari shaadi hai mere parents aa chuke hai, mehmaano ne aana shuru kar diya hai... Or tum ye kya keh rahe ho", Saloni is baat se hurt ho chuki thi.
"Dekho... Mai tumhe sab bataunga lekin abhi nahi... Abhi plz tum is shaadi se mana kar do", Nikhil ne fir se vinati ki.
"Aisa mai nahi karungi... Mere parivaar ki bhi koi ijjat hai", Saloni ne nakhare badh gaye the or wo naak sikodate huye waha se chali gayi.
In Night... Nikhil Room...
Nikhil or Nupur shaadi rokne ka plan soch rahe the.. Utne me Sarthak bhi usi balcony k raaste se aa pahucha.
"Kya hua... Kuch baat bani?", usne bekraari se pucha.
"Nahi... Us notanki Saloni ne shaadi karne se inkaar nahi kiya", Nupur gussayi thi
Tabhi Achanak Madhav ji waha aa pahuchate hai jinhe dekh sabke chehre k rang ud jata hai.
"Nikhil.. ye haramjada is waqt humare ghar me kya kar raha hai", wo sab par garje.
"Papa mai batati hoon", Nupur ne situation sambhalne ki koshish ki. Lekin Madhav ji ne apni beti ko hi chup kara diya.
Wo dhire dhire Nikhil k nazdeek aaye.
"Kitna garv tha mujhe tum par aaj tumne mera bharosa chhan se tod diya.. Isse accha aaj mai beaulaad hota", unhone bebasi se kaha. Unki baatein Nikhil ko teer ki tarha chubh rahi thi.
"Nahi papa.. Aisa Na kahiye",wo ro raha tha.
"Is shaadi se koi khush nahi rahega na Nikhil na hi Saloni.",Nupur ne bhi samjhane ki koshish ki.
"Haan.. Aap jis bete ko kos rahe hai wo aapki khushi k liye hi shaadi kar raha hai" Sarthak ne Nikhil ki tarafdaari ki.
"Mai apne bete se baat kar raha hoon tumse nahi. Tum jaise namuraad ladke ne hi ise apni chikani chupadi baato me fasa rakha hai", Madhav ji ne gusse me Sarthak ko thappad maarne k liye haath uthaya jise Nikhil ne rok liya.
Madhav ji ko aisi ummeed nahi thi. Aaj unko apna beta paraya lagne laga tha. Or wo ye sadma bardasht na kar paaye or gast kha kar zameen par gir gaye.
Unko dekh sab ghabra gaye the. Ab pure ghar me hulchul mach gayi thi.. Lihaza unhe lekar sab hospital bhaage.
In Hospital
Sab pareshaan the. Or Nikhil in sab k liye khud ko hi jimmedaar maan raha tha.
"Nikhil tum chinta na karo Uncle jaldi hi theek ho jayenge", Saloni rote huye Nikhil ko dilasa de rahi thi. Or Sarthak door khade ho kar ye sab dekh raha tha.
Idhar doctor bhi aa gaye the..
"Ab kaisi tabiyat hai unki", Vasundhara doctor k paas bhaagi.
"dekhiye unhe minor attack pada hai", doctor ne sacchai batayi
"Ab kaise hai wo, kya hum mil sakte hai", Adhiraj ne pucha.
"Haan... Lekin is waqt wo sirf apne bete se milna chahte hai", ye sun Nikhil jaldi se andar gaya.
"Papa mujhe maaf kar dijiye", wo rote huye bol raha tha.
"Nahi tumhe maafi managne ki jarurat nahi hai, ye tumhari zindagi hai or mai shayad jyada din na bacchu, mere jaane k baad tumhare jo mann me aaye tum kar sakte ho", Madhav ji ne apne bete se najare ferte huye kaha
Unki ruswayi Nikhil se sahi nahi jaa rahi thi.
"Nahi papa,aisa na kahiye aapki aisi halat meri wajah se hui hai or ab aap jaisa chahenge, jisse kahenge mai usse shaadi karunga",Nikhil ne ek kada faisla le liya tha .
Ye sunkar Madhav ji k chehre par halki si muskaan aa gayi, unko yakeen ho gaya tha unka beta abhi bhi unka hi hai, unke diye Sanskar aaj bhi usme zinda hai.
Nikhil room se bahar aata hai or baaki sab andar jaate hai... Sivaye Sarthak k.
Wo Sarthak k paas jaa kar uske saamne aa haath jod ka kehna shuru karta hai.
"Sarthak.. Jo bhi mai kehne jaa raha hoon uske liye mujhe maaf kar dena lekin mai apne papa ki khilaaf nahi jaa sakta...Unke liye mujhe Saloni se shaadi karni hi padegi.. Behtar hoga tum mujhe bhool jaao", Nikhil k sabdo ne Sarthak ko hila kar rakh diya tha.
Sarthak ko jis chiz ka dar tha wahi hua... Uske pyaar ne Mohabbat k suhane Safar k beech me hi uska saath chhod diya tha.
Uska dard uske gusse me badal gaya usne apni bhave sikodate huye Nikhil ko maarne k liye haath uthaya lekin uske dil ne use rok liya. Nikhil ne bhi Sarthak ka aisa roop pehli baar dekha tha. Lekin Sarthak bina ek shabd bole waha se chala gaya. Ye chuppi Nikhil ko bhi das rahi thi.
"Mujhe mera junoon aakhir,
Kahan se hai kahan laaya,
Jisse khwaboin mein tha dekha,
Usse rahoein mein na paaya,
Itna naa chaho yu naa saraho,
Kal mil naa paaye to jaane kya ho..
Kabhi naa kehna aisa tum,
Ab tum naa hona gum."
Itne din ka saath, itne din ka pyaar aaj tutane ki kagaar par aa gaya tha, aaj samaj or sanskaar k usool jeet gaye the or unke saamne sacche pyaar ne Dam tod diya tha.
Sarthak bhi kuch kahe bina waha se dhire dhire chal kar hospital se bahar aa gaya tha. Uski najaro me wo pal ghumne lage the jo usne Shimla me Nikhil k saath bitaye the k Kaise usne usko pehli baar Station par dekha tha or Nikhil ne bhi apne pyaar ka izhaar station par hi kiya tha. Ab uska is ajnabee sheher me koi apna na tha ek Nikhil hi tha usne bhi uska saath chhod diya tha isliye wo apne sheher wapas aa gaya. jaha uske dost the. Lekin use apne pyaar se koi shikayat nahi thi balki use garv tha apne pyaar par, apne Nikhil par, uske faisle par. Dono ne is decision ko apni destiny ka hissa maan liya tha.
Kuch din baad... In Sarthak's Home...
Sarthak aaj pehle se jyada udaas lag raha tha. Wo shubha se hi apne room me baitha guitar pakde bas wahi line dohra raha tha.
"Kuch bhi nahi Jab darmayaan
Phir kyun hai dil, tere hi khwaab bunta
Chaha ki de, tujhko bhula
Par yeh bhi mumkin ho na sakaa…
Dil sambhal ja zara
Phir mohabbat karne chala hai tu.."
Uski haalat dekh uske dost uday, Mayank, Brij ko bhi accha nahi lag raha tha.
"Kya baat hai Sarthak tumhe isse pehle itna udaas kabhi nahi dekha? ", Brij se Sarthak ki halat dekhi nahi jaa rahi thi.
"Aaj Nikhil ki shaadi hai, aaj wo kisi or ka hone jaa raha hai", aaj pehli baar uski aankho me aansu the. Husne or majak karne wala Sarthak aaj tut chuka tha.
Tabhi uske gahr ki bell bajati hai.
Brij darwaza kholta hai to shocked ho jata hai or tej awaaj me Sarthak ko bulata hai.. Sarthak uski awaaj sunkar bahar aata hai to khud bhi shocked ho jata hai. Uske saamne Nikhil khada tha or wo akela nahi tha balki Nikhil ka pura parivaar tha.
Use kuch samajh nahi aata hai.
"Nikhil tum, or ye sab yaha, or aaj to tumhari Shaadi thi na?", wo anjaan tha k kya ho raha hai.
"Haan Dear... Aaj meri shaadi hai or wo ho kar rahegi jise mai chahta hoon usse", Nikhil ne huste huye kaha
"Matlab? ", wo fir se chonka
"Matlab ye tumhare pyaar k aage mere usoolo, rutbe, Samaj k dakiyanoosi niyamo ka pulinda tut chuka hai. "Madhav ji Sarthak ko gale lagate huye kehte hai
"Tum baccho ne mujhe pyaar ka sahi arth samjha diya hai k pyaar haasil karne ka nahi balki ek dusare k liye sacrifice ho jaane ka naam hai, tumhare rishte se mujhe problem thi lekin aaj mai khud ise manjoori dene aaya hoon kyuki mujhe samajh aa gaya hai k pyaar sirf pyaar hota hai jo kisi bhi roop me kisi se bhi ho sakta hai or iska kaam khushiya failana hota hai na k gam dekar juda karna", Madhav ji Sarthak k haath me Nikhil ka haath dete huye bole.
"Lekin Saloni k saath tumhari shaadi? ", Sarthak k mann me ek sawal ye bhi tha.
"Maine kabhi Nikhil se pyaar kiya hi nahi mai bas use pana chahti thi ye mere liye ek zidd tha or jab isne mujhse Shaadi k liye haan kaha tab meri zidd bhi puri ho gayi lekin mujhe wo khushi mehsoos nahi huyi jo ek mandap me baithi dulhan ko honi chahiye", Saloni ne Sarthak ka confusion clear kiya.
"Haan Sarthak... Saloni ne khud hi is shaadi se mana kiya hai or papa ko samjhane me meri help bhi ki", Nikhil ne kaha
"Tumhara bahut bahut shukriya tumne mujhe mera Nikhil mujhe lota diya", Sarthak ne Saloni ka abhaar prakat kiya.
Sarthak Nikhil k gale lag kar rone laga ye khushi k aansu the use laga usne apne pyaar ko kho diya hai lekin Shiv ji ne uske pyaar ko usse fir se mila diya tha.
1 Saal baad... In Shiv Mandir
Aaj Shiv Mandir me Sarthak or Nikhil ki shaadi hai. Shiv ji k ashirwaad se dono k parivaar unke rishte k liye raaji ho gaye the. Or aaj unki dhoom dhaam se Shaadi huyi thi... Is vivah ka adhiktar logo ne virodh bhi kiya lekin aaj Madhav ji ko samaj ki nahi apne bete ki khushiyon ki parwaah thi. Jis jis ne is shaadi par ungali uthayi unka muh inke parivaar ne band kar diya kyuki jinke paas parivaar ka saath or bhagwaan ka ashirwaad ho unka koi kuch bigad nahi sakta.
Sab bahut khush the.. Adhiraj, Uday, Mayank, Brij dhol taase bajaa kar naach rahe the or Saloni, Suhani, Nupur naye jode par phool Barsa rahi thi or aaj apne bete k huste huye chehre ko dekhkar Madhav ji or Vasundhara foole nahi sama rahe the. Aaj ek baar fir unhe apne bete or unke diye Sanskaro par fakrr tha.
Itne utaar chadaav k baad Sarthak or Nikhil k Mohabbat bhare Suhane Safar ko akhirkaar manjil mil chuki thi...
"Mohabbat...Mohabbat.... Mohabbat
Uff.. Ye aashiqana Mohabbat
Suhane Safar Ki ek hi manjil
Mohabbat... Mohabbat...bas ye Mohabbat"

......The End......

Writer - Nits