"MOHABBAT KA SUHANA SAFAR" (The Beginning)

"Mohabbat...Mohabbat.... Mohabbat
Uff.. Ye aashiqana Mohabbat
Use khud se hi chura legi...
Mohabbat... Mohabbat...Haan ye Mohabbat"
Mai hoon aapka dost "Nits"... Jo ek baar fir se haajir hoon lekar ek nayi pyaar bhari kahani.. To aayiye is baar le kar chalte hai aapko pahado ki sair par... Jaha ka vatavaran barfili hawao ki mehek se taro taza hai, or suraj ki kirne wadiyo ko aise chamka rahi jaise hire ki chamak... Lekin jara rukiye, ye Lucknow station par hulchul kaisi..? Aayiye dekhte hai...
"Xcues me... Jara side hoyiye plz... Oops sorry... ", Lucknow station par aati jaati bheed se gujarta hua wo anjaan logo se yahi shabd dohra raha tha. Wo itni jaldi me bhaag raha tha jaise uski train chhuti jaa rahi ho... Ji bilkul uski train ka signal ho chuka tha jo kisi bhi waqt palteform ko bye bye kehne wali thi... Wo ek haath me chips k do packet or dusare haath me "Nandan" or "Champak" jaisi baccho wali magazine liye hafta hua train ki taraf badh raha tha. Utne me hi train ne horn de kar chalne ka farmaan sabhi yatriyo ko suna diya tha. Idhar train ne horn diya or udhar usne train par kadam rakha...
"Haaasshh... pahuch gaya ", usne haafte huye swar me apni T-shirt ki aasteen me paseena pochte huye itna hi kaha tha k train chal padi. Lekin use ab darr nahi tha, Wo apni manjil par aa pahucha tha.
"Nikhil... Tum kaha reh gaye the..?" Nupur ne fikarmandi se pucha .
"Wo mai chips lene laga tha, or ye comix bhi", usne dono haathon ko ek ek kar dikhate huye kaha.. Saath hi khilkhilaati huyi husi has diya.
" Tumhari baccho wali comix padhne ki aadat kab jayegi ", Suhani ne irritate hote huye kaha.
"Jab tumhari har time make-up karne ki aadat chali jayegi uske 2 - 4 saal baad ", Nikhil ne use chidhate huye jawab diya jis par Suhani ne naak sikodte huye usse chips ka ek packet chhina or khol kar khane lagi.
Tabhi Adhiraj bola, "kitna ladte ho tum dono.. Lagta hi nahi k dono bhai behen ho.."
Itne me train ne speed pakad li thi or Adhiraj ne sara luggage bhi adjust kar sahi se rakh diya tha.
Ye tha Nikhil... Cute or innocent sa ladka jo apni behen Nupur, Cousins Suhani or Adhiraj k saath
Shimla tour par jaa raha tha... Ye Nikhil ka pehla moka tha jab wo apne maa or pita k bagair akela seher k bahar nikla ho..Isliye ye safar uske liye suhana or yaadgaar hone wala tha.
Train khet khaliano se hote huye gujar rahi thi.. beech beech me nadi or naihar k bhi darshan ho rahe the. baaki sab gappe marne or masti karne me magan the.. Jabki Nikhil train ki khidki se sar tikaaye aate jaate pedo ko dekh raha tha.. Or kaan me ear speaker lagakar mann pasand gaano ka luft utha raha tha.
"Mohabbat barsa dena tu,
sawan aaya hai
Tere aur mere milne ka,
mausam aaya hai"
Yu to ye bas gana tha or Sawan ka koi thikana na tha lekin bahut jald Mohabbat barasne wali thi or uska kisi se milne ka mausam aa chuka tha... Us shaks se milne ka jo usse pichle compartment (bogi) me uske piche - piche chala aa raha tha...
Jis sukoon ko paane wo kuch din k liye pahado ki god me jaa raha tha... Wo bas chhinane hi wala tha.
Train k dusare compartment me....
"Abbe yaar...Uday mere sandwich kisne khaye.. "
Brij ne khali tiffin box dekh uday se pucha.
"Maine ".. Uday ne bewakoofi husi huste huye haath upar kiya. Tabhi Brij uska gala dabane k liye aage badha...
" Kya laga rakha hai tum logo ne... Mai yaha ghumane or prakarti ka darshan karne aaya hoon na k tum logo ka tom & jerry show dekhne."
Mayank ne najar wala Chashma ungali se chadhate huye dono ko ghoorte huye kaha.
"Kya... Kya... Kya... Prakarti ka kya karne aaye ho?" dono se achambhe se pucha
"kuch nahi... Uncultured Peoples.. Huuuuh.! " ye keh kar Mayank ne gusse se haath me rakhi koi purani hindi novel jhatke se uthayi or khol kar padhne laga..
"Yaar ab ye Sarthak kaha reh gaya? " maano Brij ne pareshaan ho kar khud se hi pucha ho.
"Hoga yahi kahi apne pyaar k saath", Mayank ne muh k saamne se bina novel hataye kaha.
"ab Sarthak ko pyaar kab hua .,tum log mujhe kabhi kuch nahi batate ho, kaise dost ho tum ", Uday ye keh kar train ki farsh par pair maarte huye seat par baitha or rote rote apple khane laga.
"Hey bhagwan.. Isko kab akal ayegi.?" Brij ne sar pitate huye kaha. "pyaar matlab Sarthak ka guitar.. Samjhe bholuchand" , Wo bina kuch sune apna Apple finish karne me laga hua tha. Or udhar train k gate k paas ek handsome sa ladka haath me guitar liye kuch gunguna raha tha.
"Hmm..dil… Sambhal ja zara
Phir mohabbat karne chala hai tu
Dil yahin ruk jaa zara
Phir mohabbat karne chala hai tu"
Haan ye Sarthak hi tha.. Wo apne best friends Brij, Mayank or Uday k saath usi train se Shimla trip par jaa raha tha. Wo gaane me magan tha tabhi Brij ne use toka...
"Yaar kin pagalo k saath tumne mujhe fasa diya hai.. Isse accha hota mai apni mosi ki beti k devar ki shaadi me chala jata.. Kam se kam waha dimaag ka dahi to na hota. "Brij ne garam hote huye kaha
" Mere liye bardasht kar le jaaneman" Sarthak ne use chhedate huye kaha"
"Dekho Sarthak...mai jaanta hoon k tum Gay ho lekin iska matlab ye nahi k tum apne best friend par dore daalo" Brij aag babula hua
Lekin dusare hi pal dono khilkhilaa kar husne bhi lage .
Ye thi Chaar Dosto ki khatti meethi nok jhok jitna wo ek dusare se ladte the usse jyada ek dusare par jaan chhidakte the.
Train bhi tej raftaar se apni manjil ki taraf badh rahi thi... Suraj ki laalima dhalne lagi thi.. Din ka safar almost pura ho chuka tha lekin abhi raat ka safar baaki tha...
In Night...
Raat k 2:30 baj rahe the. Train kisi sunsaan chote station par ruki huyi thi jaha dur dur tak bas andhera or sannata pasra hua tha.. Train k saare passengers bhi gehri nind me kharrrrrate bhar rahe the... Lekin Nikhil ko train ki uljhan me nind hi nahi aa rahi thi.. Wo khidki se bahar dekh raha tha tabhi hawao k saath ek anjaani awaaz usne mehsoos ki...
"Hmm..dil… Sambhal ja zara
Phir mohabbat karne chala hai tu
Dil yahin ruk jaa zara
Phir mohabbat karne chala hai tu"
Ye geet sunkar uske kaan khade ho gaye.. Wo bahar dekhne laga ki ye awaj aa kaha se rahi hai... Lekin wo nakaam raha.
Wo jaldi se gate par aaya tabhi use wo awaaz fir se sunayi di..
"Hmm..dil… Sambhal ja zara
Phir mohabbat karne chala hai tu.."
Wo sunsaan station par utar kar idhar udhar dekhne laga. Tabhi train halki si saraki. Or wo jaldi se chad k wapas apni seat par aa kar let gaya or train ki aaghosh me jhulta hua so gaya.
Next Morning.... On Kalka Station
"Nikhil .. Nikhil... Get up bro. Kalka station aa gaya " Adhiraj ne use jagate huye kaha. Nikhil ne bahar ka najara dekha to uska dil utsha se bhar utha.. Pahado ki thandi hawao se ghiri aisi subha usne pehle kabhi nahi dekhi thi..
Un sab ne ek ek luggage Uthaya or train se utar gaye. Fun mood me wo sab masti karte huye Shimla jaane k liye Toy Train ki taraf badh rahe the.. Tabhi Adhiraj Brij se jor se takra gaya...
"Dekh k nahi chal sakta kya ", garam mijaaj wale Adhiraj ne gusse me kaha.
"Nahi.. Kya kar lega", Brij ne bhi hool di
"Teri to", Adhiraj ne uska collar pakad liya.
"hey hey.. Dude relax...we are Sorry. Just chill ", Sarthak ne jaldi se aakar beech bachav kiya.
Idhar Nupur ne bhi Adhiraj ko shaant karaya.
Adhiraj jaise hi saamne se hata Sarthak ki najar sidha Nikhil par padi jo Adhiraj k bilkul piche hi khada tha. Maano thandi hawao k jhonke ne Sarthak ko abhi abhi chhua ho. Nikhil bhi use barabar dekhe jaa raha tha.
Nupur, Suhani, Adhiraj aage badh gaye jabki Nikhil abhi bhi wahi khada tha.
"Nikhil... Chalo jaldi", Suhani ne use bulaya.
Nikhil palat kar unke saath chal diya.
"saare mood ki aisi taisi kar di kamine ne ", Brij abhi bhi gusse me tha
"Chal koi nahi... abhi us kamine k haathon tujhe pitwa k tera mood bana dete hai... Hahahaha", Uday ne Brij ki khichayi ki
"chup raho tum dono... Kaisi abhadra bhasha ka prayog kar rahe ho", Mayank ne dono ko chup karaya.
"Kya... Kya... Kya... abhadra kya", dono saath me chonke
"kuch nahi...manner less Peoples.... Huuuuh.. Sarthak chalo Toy Train ka signal ho chuka hai" Sarthak abhi bhi apne me hi kahi khoya hua tha
"Saaaaarthak... Chalo ab", Mayank chillaya Jisse Sarthak ka dhyaan tuta or wo sab usi train se Shimla k liye chal diye Jisse Nikhil or uske cousins jaa rahe the.
In Train
Train pahado k bich se rengati huyi chal rahi thi..
Dur dur tak bas unche unche pahado ka saya tha.. Saath Saath gehari khayi ka darr bhi. Subha subha ki rangat fizao ko rangeen kar rahi thi. Train Kabhi gufaao me se ho kar to gujarti to kabhi pahado k ghane jungle me se...
Sab is khushnumaa mausam ka maja le rahe the lekin Sarthak abhi bhi us masoom chehre me kahi gum tha..
Or dusari taraf Nikhil is baat se anjaan Suhani, Nupur or Adhiraj k saath selfie lene or matargashti karne me mashgool tha.
In Shimla...
Kuch hi ghanto ka safar pura kar k Toy train Shimla station par pahuchi. Almost shaam ho chuki thi. Nikhil sabke saath utra or wo log taxi kar k hotel k liye nikal gaye.
Idhar Sarthak us anjaane chehre ko ek baar fir se dekhne ki laalach me apna sar idhar udhar ghuma raha tha.
"kise dhund rahe ho yaar.? ", Mayank ne pucha
"T..Tu...Tum hi log ko", Sarthak ne bahana banaya. Wo charo bhi station se bahar nikal kar hotel jaane k liye taxi dhudne lage.
In Hotel...
Un charo ne do room liye. Ek me Sarthak or Brij ruke. Dusare me Mayank or uday.
In Night...
Sarthak room ki balcony me khada dur tak bikhare pahado me gum aapna guitar bajate huye gaa raha tha.
"Aisa kyun kar hua janu naa
Main janu naa o..o..
Dil sambhal ja zara
Phir mohabbat karne chala hai tu
Dil yahin ruk ja zara
Phir mohabbat karne chala hai tu"
Is gaane ko sun kar Nikhil jaldi se doudta hua apni room ki balcony me aaya jo usi hotel me Sarthak k room se do floor niche thi.. Nikhil fir se us awaaj k sire ko talashne laga kyuki ye wahi awaj thi jo usne train me suni thi. Tabhi Achanak wo awaaz aana band ho gayi. Or wo udaas ho kar reh gaya.
Idhar Brij ne Sarthak k guitar ko chhinate huye bola,
"O Mr. Aashiq... Raat bhar ye tuntuna hi bajana hai yaa sona bhi hai... Chalo sone ab " Or Sarthak bhi halka sa muskura kar sone chal diya.
Next Day...
Pahado ki chotiyo par barf chhayi huyi thi. Or Dhoop ki chamak us par chaar chaand laga rahi thi. Un fizao me Sarthak paragliding ka maja le raha tha tabhi upar se uski najar barf me kehlte Nikhil par padi jo Adhiraj, Nupur or Suhani k saath athkheliya karte huye ek dusare ko snow ball maar raha tha. Bas Sarthak jaldi se dharti pe
Utar aana chahta tha.
"Suhani ki bacchi tujhe to mai nahi chhodunga.. Hahahaha," Nikhil ne snow ball fekte huye kaha.
Utni der me Adhiraj ne uspar hi piche se vaar kar diya.
"Adhiraj .. Tu to ab gaya ", Itna kehte hi Nikhil ne snow ka bahut bada sa ball banaya or Adhiraj ki taraf jor se feka achanak Adhiraj ek dum se jhuka.. Or wo ball sidha Sarthak k sar se takraya or wo barf ki safed chadar par lamblet ho gaya.
Sab uski taraf ghabrahte huye bhage.
"O God, dekho kahi marr var to nahi gaya.", Nupur ne fulti saans me kaha
"Aree ye to wahi ladka hai jiska dost station par Adhiraj se takraya tha ", Suhani ne use pehchaan liya tha
"Tab to marr gaya ho to accha hai, sala bahut hoshiyari maar raha tha, good shot Nikhil ", Adhiraj ne huste huye maskari ki.
"Shut up Adhiraj, guys pehle ise uthao to ", Nikhil ne sahaanbhuti jatayi.
"Hey dude get up, are you all right?", Adhiraj ne use hilaya.
Tabhi Sarthak ne dhire se apni aankhen kholi.
Use jinda dekh sabne chain ki saans li.
"Mai kon hoon?... Kaha hoon?....Aap sab kon hai?", Sarthak ne acting ki
Bas uska itna kehna tha k sabke hosh ud gaye.
"O teri, ye to Ghajini ka Amir Khan ban gaya. ", Adhiraj ne uska majak udaya
"Ab kya hoga? ", Nupur ghabrayi thi
"Kuch nahi.. Nikhil par attempt to murder ka charge lagega or kya", Suhani ne bhi majak kiya.
Sarthak un sabki bewakoofi bhari baaton ko samajh raha tha lekin anjaan bana hua tha. Tabhi Nikhil ne kaha, "Majak baad me karna pehle ise yaha se le kar chalo." or Sab use hotel le aaye.
In Hotel Room...
Nikhil k room me Sab use ghere huye the...
"Ab aap kaisa mehsoos kar rahe hai? ", Doctor ne usse pucha
"Aap kon? ", usne Doctor se cross question kiya
"Ye doctor hai, aapki haalat ko dekhte huye humne inhe bulaya hai... Waise aap k dost kaha hai? ", Nupur ne pucha
"isi hotel me honge", Sarthak k muh se fisla hi tha
"Kyaaaaaa", sab ek saath chonke.
"Kisi hotel me honge , kyu aap logo ne kya suna?" Sarthak ne baatein ghumayi
"Hume laga aapne kaha isi hotel me honge ", Suhani ne use shaq ki najar se ghoora
"Chaliye ye acchi baat hai k aapko yaad k aapke dost toh hai, accha to kis hotel me hai? , unka contact numnber batatyiye plz? ", Doctor ne Sarthak k aage sawalo ki jhadi laga di
Sarthak mann hi mann gussaya "ye gadha doctor to mera plan hi bigad dega".
"Doctor mujhe bilkul yaad nahi hai, or mai mobile ka code word bhi bhool gaya hoon ... Kya mai thodi der so jaau? ", itna kehte hi wo jaldi se chadar taan k let gaya.
"Dekhiye jab tak inko sab kuch yaad nahi aa jata tab tak aapko inhe apne saath hi rakhna hoga", Doctor ne un sab ko side me le jaa kar dhire se kaha, lekin Sarthak unki baatein Kaan lagaye sun raha tha or mann hi mann hus raha tha.
"Kya musibat hai... Poore holiday ki aisi tesi ho gayi ", Adhiraj ne chidchidate huye kaha
"don't worry guys.. Meri wajah se hua hai ye sab isliye mai hi inki care karunga ", Nikhil ne humdardi jatayi.
Sarthak apne plan me kamyab ho gaya tha jo usne Nikhil k aas paas rehne k liye banaya tha.
Dusari taraf Brij, Uday, or Mayank use call kar rahe the lekin Usne unka call receive nahi kiya, bas message drop kiya tha "Come back in hotel" to Wo sab bhi thak haar k hotel aa gaye.
In late night...( Nikhil room)
Sarthak pure bed par kabza jamaye hua tha jabki Nikhil sofe par apni nind puri kar raha tha.
Sarthak use pyaar bhari nighao se dekh raha tha.
Pahado me chupa chaand itna khoobsoorat nahi lag raha tha jitna us sofe par sota Nikhil lag raha tha . Use uske chehre par pyaar aa rah tha, tabhi us k phone vibration ne uska dhyaan toda.. Usne dhire se dekha to screen par Brij ka number jhilmila raha tha. Wo bina awaj kiye utha or balcony me aa kar phone receive kiya, "Hello"
"Yaar tum... Aaj pura din kaha the,? Or phone receive kyu nahi kiya?... or is waqt kaha ho.?... Aakhir chakkar kya hai ", Brij ek saans me sab kehta chala gaya.
"Hey... Relax.. Mai thik hoon isi hotel k kisi dusare floor par hoon, room Number nahi pata lekin is room ki balcony se pahad or chaand dikhte hai." Sarthak ne bakwaas ki
"What....? Yaar is hotel k har room ki balcony se pahad or chaand dikhte hai, tum kya keh rahe mujhe kuch samjh nahi aa raha? ", Brij ne apna sar pitate huye kaha
Sarthak ne use short me puri kahani bata di,
"O accha... To ye baat hai, Janab apne Raj Kumar k paas hai, lekin bro dhyaan se uske saath wale kamine ko pata chal gaya to teri khair nahi..... Hahahaha "., Brij ne Adhiraj par vyang kasa.
"Chal bye" Sarthak itna keh kar jaise hi palta to dekha saamne Nikhil khada hua tha. Usne uski saari baatein sun li thi.
"To tum bhoolne ka natak kar rahe the, tumhe sab kuch yaad hai ", Nikhil ne gusse me kaha
"Haan... Lekin mai bas.. ", Sarthak ne baat puri bhi nahi ki thi usse pehle usne use toka
"you cheater...jhuthe....! Ruko abhi mai sabko bulata hoon"., Nikhil sabko bulane jaa raha tha tabhi Sarthak ne jaldi se uska haath pakad k kheech kar diwar se tika diya or apni bajuo ki giraft me use fasa liya.
" Chodo... Chodo mujhe ye kya kar rahe ho, Arre koi Bachao mujhe. ", Nikhil tadapti machli sa fadfadaya
"Hahaha... Tujhe mujh jaise Rakshas se bachane koi nahi aayega.. Hahaha ", Sarthak ne bhi tafri ki
"Dekho tum mujhse door raho...nahi to mai.... Nahi to mai.. " Wo bolte bolte chup ho gaya.
" Hahaha...Kuch nahi kar sakte tum... Tum meri giraft me ho.. Tumhe mujhse koi nahi chhuda sakta... Aaj to tera kaam tamam", Sarthak ne bilkul serious acting ki
Wo dhire dhire apne hoth Nikhil k paas la raha tha, Tabhi Nikhil ne darr se aankhe band kar li, Wo uske maasoom chehre me kho chuka tha, tabhi usne apni pakad dhili ki or dur jaa kar jor jor se lotpot hokar husne laga. Nikhil use achambhit hokar dekh raha tha or soch raha tha achanak is ladke ko kya ho gaya.
"Kyu... Kaisi lagi meri acting.. Tum logo ko bada shok tha na mujhe or mere dost ko darane ka.. Ab apni shakl dekho kaise 12 baje huye hai... Hahahahaha", Sarthak ne Adhiraj ka badla Nikhil se liya tha, lekin Usne ye sirf badle k liye nahi kiya tha, Wo sach me uske kareeb rehna chahta tha.
Ab to Nikhil ka para saatve aasmaan par chad chuka tha usne Sarthak ko dhake de kar room se bahar nikala. Isse pehle Sarthak use samjha pata usne darwaza uske muh par de mara. Or mann hi mann use lakho galiyaan de chuka tha.. Idiot, duffer, or na jaane kya kya.
Next day ...
Nikhil ka door knock hua usne.. Darwaza open kiya to Adhiraj, Suhani or Nupur kahde the.
"Ab wo Ghajini ka hero kaisa hai? ", Adhiraj ne pucha
"Bahut bura ... Huuuuh ", Nikhil ka gussa abhi bhi utra nahi tha
"Par wo hai kaha? "., room me na dikhne par Suhani ne pucha
" Jahannum me hoga .. Mujhe nahi pata , jab mai subha utha tha usse pehle wo jaa chuka tha", usne raat wali baat sabse chupayi
"Aree to hume use dhundna chahiye ", Nupur ko tension huyi.
"Koi jarurat nahi hai Mother India... Waise bhi accha hai bala tali ", Adhiraj ne Nupur ki khilli udayi.
Suhani or Adhiraj hus rahe the jabki Nikhil toh gusse me kuch or hi soch raha tha.
In Sarthak room...
" Dosto .. Apne Sarthak bhai to kamal ke nikale kya Accha Badla liya unse ", Brij... Mayank or uday k saamne dinge haankte huye pichle din ki kahani suna raha tha jabki Sarthak bed par lete guitar k taaro ko chhedate huye pichli raat k baare me soch raha tha jab wo Nikhil k kareeb tha.
In Evening.... On Mall Road...
Nikhil or uske saathi Shimla k Mall Road ki sair kar rahe the..
"Hey.. Look it guys, 'Church' ... Chalo na chalte hai.", Nikhil ne Utsha se kaha.
"Nahi... Tum jaao hum sun set point par milenge "Nupur ne kaha
In church...
Pura church khali tha.. Nikhil aankhe band kar Jesus se pray kar raha tha.. Tabhi piche se ek bhaari awaaz aayi
"Jo tum maang rahe ho wo to tumhare piche hai"
Usne piche mud k dekha to saamne Sarthak khada tha.
"Tum... Tum mera peecha chhod kyu nahi dete ", uske muh se bas itna hi nikala.
"Kaise chhod du, tumne mujhe pray me yaad kiya.. lo mai aa gaya. "Sarthak ne hero style me dialogue mara
" Tum aakhir chahte kya ho? ", Nikhil uski baaton se pareshaan ho chuka tha,
"Tumhare saath bas kuch pal baatein karna chahta hoon ", Sarthak ne bedhadak bola
"Get lost ", Nikhil bhi dahada
"Na Na... Bhagwaan k ghar me kisi ko mana nahi karte... Mai kal tumhara wait Kufari ki sabse unchi pahadi par kahunga.. Or mujhe yakeen tum jarur aaoge "., Sarthak apna farmaan use suna kar jaane laga tha
" Mai nahi aaooooooonga ", Nikhil bhi ziddi hokar chillaya
"Tum jarur aaoge.. Mai tumhara wait sadiyo tak karunga ", Sarthak bina mude apni baat kehta church k bahar nikal gaya. Or Nikhil itna sa muh banakar reh gaya.
In Night...
Nikhil apne room me idhar se udhar chakkar kaat raha tha. "wo samjhta kya hai apne aap ko, ek to hume Bewakoof banaya or upar se mujhe hi dhamkata hai, sikhata hoon sabak mai use , karne do intezaar hero ko, thand me akal thikane aa jayegi"., uska gussa bas footne wala hi tha.
" kiski akal thikane aa jayegi? ", Nupur room me aayi.
"kisi ki nahi" Wo balcony me aa pahucha
Tabhi uske kaano me fir se wahi awaje gunji.
"Jis raah pe, hai ghar tera
Aksar wahan se, haan main hoon guzra
Shayad yahin dil mein raha
Tu mujh ko mil jaye, Kya pata…
Dil sambhal ja zara
Phir mohabbat karne chala hai tu.. "
"Fir se wahi gana...kitni madhur aawaj hai.. Akhir is awaaz k piche hai kon." usne khud se kaha tabhi woh awaj ek baar fir se band ho gayi.
Or Wo church wala ladka uske khayalo me fir se lot aaya...
Next Day... In Kufari
Sarthak Kufari ki pahadiyo par shiddat se Nikhil ka intezaar kar raha tha, Use poora yakeen tha k wo aayega... Bahut der ho chuki thi or ab to snow fall bhi shuru ho gaya tha... Charo taraf dhund chhayi huyi thi... Kuch der baad usi dhund me se ek saya aata hua dikha.. Jo Nikhil hi tha. Wo barf me tairte ek Raj Kumar se kam nahi lag raha tha.. Sarthak ki aankhe chamki
"Mujhe pata tha tum aaoge", Sarthak chehka
Nikhil ne badi si muskaan di or ek jor dar thappad uske gaal par raseed diya... "Chataaaaaak".. Bechare Sarthak ko din me taare najar aa hi gaye the.
" Ye thappad hume Bewakoof banane k liye hai...
Aayinda kisi or ki acchai ka fayda uthane se pehle is thappad ko yaad kar lena", Sarthak ko realize hua k uska chota sa majak Nikhil ne serious le liya.
Nikhil jaane laga tha tabhi Sarthak ne use roka
"I'm sorry... Jo bhi tumhara naam hai., maine bas, majak kiya tha. "
" Nikhil.. naam hai mera.. Hope so mujhe or is thappad ko bhuloge nahi", usne bhi attitude dikhaya. Or waha se chal diya.
Itne jhannatedar thappad khane k baad use sirf uska naam hi pata chala tha fir bhi use degree milne jitni khushi ho rahi thi.
In Hotel... (Sarthak room)
Sarthak masoom bacche ki tarha gaal par haath rakhe bed par palthi maar k baitha hua tha or uske dost use ghere huye the.
"Sale pure group ki naak kata di, thappad kha k aa gaya, dena tha wahi use ek ghuma k ", Brij tamtamaya.
"Hahahahaha.... Hahahaha... "Uday ki to husi hi nahi ruk rahi thi.
" upar se sorry bhi bol diya...", Mayank ne aag me ghee dala.
"Or bolo "... Brij ne Sarthak k sar par teep maari.
" Hahahaha ", Uday abhi bhi huse ja raha tha.
"Bas ab or nahi.. dhusham ki team ko sabak sikhana hoga.. Kaise bhi kar k.. Bhaiyo do haath sab log ", Brij ne haath faila kar josh bharte huye sabka saath maanga.
"Haan bilkul.. ", Mayank or Uday ne bhi jung ka bigul bajaya.
Sarthak un sabko Tatya Tope bana dekh apna sar pakad k baith gaya.
Next Morning...
"Guys.... Utho... Utho jaldi... Abe uth na... Dushman ki team maidan chhod kar bhaag rahi hai," Mayank doudte hue aaya or Brij or Sarthak ko laat Maar Maar k jagane laga.
" Kon Dushman, kiska maidan " Uday aankhe masalte huye washroom se nikla.
"Aree usi kamine ka group.. wapas jaa raha hai.. Maine abhi unhe taxi me luggage rakhte huye dekha hai ." Mayank ek saans me kehta chala gaya.
" Jab dhusham hi bhagoda ho to uske liye apni nind kyu kharaab karna ", Brij jamhayi le kar fir se so gaya. Lekin Sarthak ki nind to maano udan chuu ho chuki thi.. Wo kaise bhi kar k Shimla station pahucha..
Shimla Station....
Wo Nikhil ko idhar udhar dhoond raha tha... Tabhi uski najar uspar padi, jo book shop wale se 5 rupaye ki bargaining k liye lad raha tha... Ab Uski jaan me jaan aayi thi.
"Bhaiya aapko 5 rupaye kam karne hi honge... Akhir "Nandan" Or "Champak" comix ka sawal hai", Nikhil book shop wale se lad raha tha.
"Nahi sir, hume nahi pura padega ", bookseller bola.
"Poora aadha mai kuch nahi jaanta, mai ek dhela bhi jyada nahi dunga. ", Nikhil jid par aa gaya tha.
"Koi nahi bhaiya ... Aap ye comix mujhe de do, kitne huye ", Sarthak ne comix Nikhil k haath se chhinte huye kaha.
"How dare you... Tumhari himmat kaise huyi meri comix lene ki ", Nikhil uspar chad baitha.
"Tumhari comix... Par ispar to 'Nandan' or 'Champak' likha hua hai..Hahahahaha" usne ye keh kar uske gusse ko hawa de di thi
"Bhaiya mai aapko iske double paise dunga lekin ye comix to ab mai hi lunga ", Nikhil ne bookseller ko apna faisla sunaya.
"Bhaiya mai iske 3 guna jyada paise dunga.. Lekin ye comix mujhe hi chahiye", Sarthak bhi kam nahi tha.
"Aree sir to aap dusari le lo., Mere paas or bhi hai ", bookseller ne idea diya.
"Naaaaahi, mujhe ye hi chahiye ", dono ek saath book seller par dhamke
Idhar dono ki mahabharat shuru thi or udhar train bhi nikal bhaagne ko ready thi., or wo kab chalne lagi dono ki tu tu mai mai me pata hi nahi chala.
Sarthak ka plan kamyaab ho chuka tha wo use ladayi me uljhaye hua tha..
Tabhi Nikhil ko Toy train ki awaj ne chokaya... Or wo jhat se palta. Uske hosh ud gaye jab usne dekha train to nikal chuki thi.
"Arre meri train... Koi roko use... Aree mai chhut gaya.. Koi to chain kheencho... " Nikhil chillate huye train k piche bhaga. Lekin train ne speed pakad li thi.. Na Nikhil us par chhad paya na Adhiraj, Nupur or Suhani niche utar paaye.. Or dekhte dekhte train platform se palayan kar gayi.
"Hahahahaha".... Dusari taraf Sarthak apna pet pakde us par jor jor se hase jaa raha tha.
" Sir aapki comix ", Sarthak ne Nikhil ko comix dete huye apni husi dabayi.
"You despo, kis duniya se aaye jo tum, tumhari wajah se meri train miss huyi hai or mai khali haath, is haalat me, Shimla jaise Stupid station par hoon or ab kya karu. Bolo ", Nikhil ne uspar apni bhadaas nikali.
"Meri kya galati.. Maine to pehle kaha tha comix mujhe de do", usne tanj kasa.
"O God... Kis jhamele me fasa diya mujhe", Wo pair patak k paas ki bench par baith k rone laga.
Uske aansu dekh Sarthak ko kuch accha nahi laga,
"Dekho dekho... I m Sorry, plz ro mat. "Sarthak ne samjhaya
" Tum... Tum dur raho mujhse mujhe mere haal par chhod do ", Nikhil ne dhamki di thi.
"Ok Fine .. Bye ", Sarthak bhi uth k chalta bana
Thodi dur jaane par piche se awaaz aayi..
"waah....! kya insaniyat hai ek besahare ko chhod k Jane lage", Sarthak uski masumiyat par
muskuraya. Tabhi Nikhil ka phone baja..
"Hello..hmm... Hmmm.. Ok Adhiraj ", Wo Adhiraj ka call tha
"ab kya hua? "Sarthak ne bemann se pucha
" Dekho..Tumhari wajah se ye sab problem huyi hai ab tum hi ise sudharoge....samjhe "., Nikhil ne us par apna haq jamaya.
" Ji sir, lekin kaise? " Sarthak ne haami bhari
"Mere cousin Kalka station par mera wait karenge isliye tumhe mujhe by taxi waha chhodna hoga. Mere paas jyada paise nahi hai... Plz help me. " Nikhil ne request ki
Uske is pyaar bhare request ko Sarthak mana nahi kar paya or uske aansu se wo pehle hi rubaru ho chuka tha. Wo mom sa pighal gaya.
"Thankyou so much. Jo bhi tumhara naam hai ", Nikhil ne kaha.
"Sarthak... Sarthak naam hai mera.. "
" Sarthak.. Nice to meet you, by god aaj tak mujhe kisi se mil kar itni khushi nahi huyi jitni tumse milkar huyi hai", Nikhil ne acche se makkhan lagate huye hand shake kiya.
Sarthak ne station k bahar se hi taxi ki or dono kalka k liye rawana ho gaye.
On the way....
Unki Taxi apni puri speed se pahado k naagin rupi raaste me angdayiya lekar doud rahi thi.
Nikhil pure din ki afra tafri k baad thak k Sarthak k kandho par hi sar rakh so chuka tha.. Sarthak ko isse jyada khushi shayad hi pehle kabhi huyi thi.
Wo ye safar khatam nahi hone dena chahta tha.
Uske dil ki baat jubaan se bahar aayi jab haseen wadiyo me usne gana shuru kiya.
"Kuch bhi nahi Jab darmayaan
Phir kyun hai dil, tere hi khwaab bunta
Chaha ki de, tujhko bhula
Par yeh bhi mumkin ho na sakaa…
Dil sambhal ja zara
Phir mohabbat karne chala hai tu.. "
Is jaani pehchaani awaaz ko sun kar Nikhil ki aankh khuli or jab usne dekha to shocked ho gaya.
Jis awaaz k sire wo itne dino se talash raha tha wo sira Sarthak hi tha jo kadam kadam par usse takra raha tha.. Ye un dono ki destiny hi thi.
Geet Sarthak gaa raha tha lekin guitar Nikhil k mann me baj rahe the..
"Ye gana ? "., Nikhil exited hua
"Ye mera favorite song hai jo mai humesha gata hoon..kyu kya hua?",Sarthak ne jawab diya.
" Nahi... Kuch nahi", Nikhil ne kuch chhipaya lekin Sarthak ne uski chuppi ko bhaanp liya tha.
Ab dil haarne ki baari Nikhil ki thi... Usse Sarthak ko dekh kar kuch kuch hone laga tha.
Isi soch me dube dono ko pata hi nahi chala k Kalka station kab aa gaya.
Kalka station....
Station par Adhiraj, Nupur, Suhani teeno Nikhil ka wait kar rahe the tabhi Nikhil bhi Sarthak k saath aa pahucha
"Nikhil.. Tumne to hume dara hi diya ", Nupur uske gale lag kar boli
"Sab log Sarthak ji ko thanks boliye.. Agar ye na hote to mai yaha tak aa nahi pata ", Nikhil ne Sarthak ki badhayi sabke saamne ki
"Par ye tumhe kaha mil gaye or inki to Yaadast gum ho gayi thi ", Suhani abhi bhi Sarthak ko shaq ki najar se dekh rahi thi.
"Arre wo lambi kahani hai baad me bataunga ", Nikhil ne baat sambhalte huye kaha ye chiz Sarthak ka bahut pasand aayi.
Tabhi Lucknow jaane wali train ka announcement hua..
"Accha chalo.. Ab Lucknow Jane k liye train nikalne wali hai", Adhiraj ne sabko chetaya.
"Haan haan.. Kahi fir se prince charming chhut na jaaye ", Sarthak ne dhire se Nikhil k kaan me sarghoshi ki.
Wo log train me baith gaye.. Tabhi Nikhil aakhiri baar Sarthak se milne gate par aaya.
"I m really very sorry maine aapko us din ko thappad mara tha", Nikhil ko ab guilt feel ho raha tha.
"Arre its oki., waise dikhne me naajuk ho lekin kaafi bhaari haath hai tumhara", Sarthak ne chutki li.. Is par dono husne lage or huste huste dono k hi aankhen nam ho gayi.
Tabhi train chal padi. Sarthak ka dil train ki speed se tej dhadak raha tha. Wo mann se chahta tha k ye train bhi chhut jaye lekin har baar kismat saath nahi deti.
Idhar Nikhil ko bhi anjaane se ehsas ne chua tha. Dekhte dekhte train aage badh gayi.. Tabhi Nikhil k dimaag ki ghanti baji usne kisi se pen lekar apne rumaal me kuch likh kar platform par feka. Utni der me Train hawa si Sarthak ki aankho se ojhal ho gayi saath hi saath Nikhil bhi.
Sarthak us rumal ko uthane douda, Jab usne dekha to usme likha tha..
"Thankyou Sarthak... Tumne mere safar ko manjil de di.. Jis awaaz ko mai kab se dhund raha tha wo kitni baar mere saamne thi or mai pagal pehchaan bhi nahi paya... Lekin ab mai pehchaan gaya hoon isliye tumse apne dil k armaano ka ijhaar kar raha hoon, mai nahi jaanta tum mujhe pasand karte ho ya nahi.. Lekin itna jaanta hoon k guitar k taaro ki tarha tumne mere dil k taaro ko chhed diya hai.. Agar mera yakeen saccha hai to tum mujhe jarur contact karoge...your prince charming " Niche uska contact number likha tha.
Ye padh k maano Sarthak ki khushi ka thikana na raha. Jo safar ek majak me shuru hua tha wo aisa roop bhi dharan kar lega dono ko pata nahi tha. Shimla ka safar to pura ho chuka tha lekin Sarthak k liye ye safar ka ant nahi tha balki ek naye safar ki shuruvat thi. Mohabbat k Suhane Safar ki shuruvat...
"Mohabbat...Mohabbat.... Mohabbat
Uff.. Ye aashiqana Mohabbat
Sarthak or Nikhil k darmiyan
Mohabbat... Mohabbat...bas ye Mohabbat"

To be continue....

Writer - Nits